উদ্যান শস্য ক্ষেত্ৰখনত স্ব-নিয়োজনৰ বাট মোকলাইছে মমী পেগুৱে

প্ৰচুৰ সম্ভাৱনীয়তাৰে ভৰা অসমৰ এখন উল্লেখযোগ্য ক্ষেত্ৰ হ’ল উদ্যান শস্যৰ ক্ষেত্ৰখন। এই ক্ষেত্ৰখনৰ সৈতে জড়িত হৈ স্ব-নিয়োজনৰ বাট মুকলি কৰি ল’ব পৰাকৈ ৰাজ্যৰ যুৱক-যুৱতীসকলৰ সুবিধাৰ্থে চৰকাৰে উদ্যান শস্য বিভাগৰ অধীনত ‘উত্তৰ-পূৰ্বাঞ্চল আৰু হিমালয়ৰ পাদদেশৰ ৰাজ্যৰ বাবে উদ্যান শস্য অভিযান আঁচনি’ নামেৰে এক অভিলাসী আঁচনি ইতিমধ্যে গ্ৰহণ কৰিছে। ইয়াৰ দ্বাৰা অসমৰ বিভিন্ন প্ৰান্তৰ নিবনুৱা যুৱক-যুৱতীসকল উপকৃত হোৱাৰ লগতে এই ক্ষেত্ৰখনৰ উন্নয়নৰ দিশত অৱদান আগবঢ়াবলৈ সক্ষম হৈছে। এই আঁচনিৰ দ্বাৰা লাভৱান হোৱা মাজুলীৰ এগৰাকী হিতাধিকাৰী হ’ল মমী পেগু । উপৰোক্ত আঁচনিৰ অধীনত চৰকাৰৰ পৰা লাভ কৰা সহায়-সহযোগিতাৰে এখন নাৰ্চাৰী খুলি তেখেতে আত্ম সংস্থাপনৰ বাট মোকলাই ল’বলৈ সক্ষম হৈছে।