দুগ্ধ উৎপাদনেৰে স্বাৱলম্বী বজালীৰ বৰ্মন দম্পত্তি

বৰপেটা জিলাৰ বজালী অঞ্চলৰ বাসিন্দা জোনা তামুলী বৰ্মন। গো-পালনেৰে স্বাৱলম্বিতাৰ এক অপূৰ্ব নিদৰ্শন দাঙি ধৰি শ্ৰীযুতা বৰ্মন বৰ্তমান এইঅঞ্চলৰ এগৰাকী আগৰণুৱা মহিলা গো-পালক হিচাবে স্বীকৃতি লাভ কৰিছে। এজনী গাইগৰুৰে আৰম্ভ কৰা এই সাফল্যৰ যাত্ৰা বৰ্তমান আগবঢ়িছে ১৯ জনী গাই গৰুৰে। ২০০৪ চনৰে পৰা গো-পালনৰ লগত জড়িত এই যাত্ৰাত তেখেতক প্ৰতি মূহুৰ্তত সহায়ৰ হাত আগবঢ়াই আহিছে স্বামী প্ৰণৱ কুমাৰ বৰ্মনে। প্ৰতিদিনে প্ৰায় ১৫০লিটাৰকৈ গাখীৰ উত্পাদনেৰে এক লাভজনক ব্যৱসায় হিচাবে গো-পালনক সাৰথি কৰি লোৱা বজালীৰ এই দম্পত্তিয়ে দেখুৱাইছে স্বাৱলম্বিতাৰ নতুন বাট। গো-পালনত দেখুওৱা এই সাফল্যৰ বাবে জোনা তামুলী বৰ্মনে ইতিমধ্যে লাভ কৰিছে ‘মুখ্যমন্ত্ৰী প্ৰেৰণা বঁটা’। বজালী অঞ্চলৰ লগতে অসমৰ নৱপ্ৰজন্মৰ বাবে জোনা তামুলী বৰ্মন হৈছে এক অনুপ্ৰেৰণাৰ উৎস।